Şriftin ölçüsü :

Saytın rəngi :

“2016-cı ildə Qubadlı rayonunda görülən işlər və 2017-ci ildə qarşıda duran vəzifələr”

14 fevral 2017 | 16:00

14 fevral 2017-ci il tarixdə Qubadlı rayonunda “2016-ci ilin sosial-iqtisadi inkişafının yekunlarına və qarşıda duran vəzifələrə dair” rayon İcra hakimiyyəti başçısının hesabatı olmuşdur. Yığıncağda Prezident Administrasiyasının məsul işçisi Ağa-Əli Əhmədov, Milli Məclisin deputatı İmamverdi İsmayılov, rayonun idarə müsəssisə və təşkilat rəhbərləri, ictimaiyyət nümayəndələri iştirak edirdilər.
Tədbir iştirakçıları Ulu öndər Heydər Əliyevin rayon icra hakimiyyətinin foyesində yerləşən abidəsi önünə gül dəstələri qoyduqdan sonra ötən il rayonda görülən işlərin əks olunduğu stendlərə baxış keçirdilər. Sonra hesabat toplantısı iclas zalında davam etdirildi.
İclas acıq elan edildikdən sonra rayon İcra hakimiyyətinin başçısı Malik İsaqov il ərzində görülmüş işlərlə bağlı məruzə etdi. Başçı nitqində qeyd etdi ki, beynəlxalq aləmdə mövcud olan gərginlik və böhranlara baxmayaraq respublikamızda 2016-cı ildə  bir çox sahələrdə uğurlu nəticələr əldə edilmişdir. Əvvəlki illərdə olduğu kimi ötən ildə də təhlükəsizliyin vacib amillərindən biri olan ictimai-siyasi sabitlik qorunub saxlanılmış, xalqımızın sülh, əmin-amanlıq şəraitində yaşaması təmin edilmişdir. Düzgün siyasət nəticəsində qeyri-neft sənayesində 5 %,  kənd təsərrüfatında 2,6 % artım olmuşdur. Davos Ümumdünya İqtisadi Forumunun hesablamalarına görə Azərbaycan iqtisadiyyatı dünya miqyasında rəqabət qabiliyyətliliyinə görə 3 pillə irəliləyərək 40-cı pillədən 37-ci pilləyə qalxmış, MDB məkanında yenə də birinciliyi saxlamışdır.
Rayon İcra hakimiyyətinin başçısı aprel döyüşlərindən danışaraq, həmin döyüşlərdə rayon hərbiçi sakinlərinin də qəhrəmanlıq göstərdiyini, Şükür Həmidovun Milli Qəhrəman adına layiq görülməsini, Mais Bərxudarova  isə general- mayor rütbəsinin verilməsini, döyüşlərdə qəhrəmanlıq göstərən sərhədləri qoruyan bütün əsgər və zabitlərimizin hünərinə verilən dəyər kimi qiymətləndirmişdir.  
Məruzəçi 2016-ci ildə rayonda məcburi köçkünlərin mənzil-məişət şəraitinin yaxşılaşması, kommunal problemlərinin həlli istiqamətində işlərin görüldüyünü qeyd edərək bildirdi ki, müraciətimiz  əsasında Qaçqınların və Məcburi Köçkünlərin İşləri üzrə Dövlət Komitəsi tərəfindən Saatlı rayonunda məskunlaşan  2  ailə, Sabirabad rayonunda isə 3 ailə yeni mənzilə təmin edilmiş,  Sumqayıt şəhər 10 saylı Peşə Liseyində 3 ailəyə  şəraiti olan mənzillər tikilmişdir. “Şəfa” sanatoriyasında və  Kimyaçılar qəsəbəsində 2 köçkün ailəsinə də otaqlar verilərək onların  mənzil şəraitləri yaxşılaşdırılmışdır.  Rayon İcra hakimiyyəti tərəfindən 47-ci məhəllə və 12-ci mikrorayon ərazisində əvvəllər tikilmiş iki sosial obyektdə  qaz sayğacları quraşdırılaraq qazın müntəzəm verilməsi təmin edilmişdir. “Sumqayıt” mehmanxanasının və 10 saylı Peşə Liseyinin zirzəmisindəki su təmizlənmiş, Ələt qəsəbəsində bir ailənin mənzilinə qaz xətti çəkilməsinə köməklik edilmiş, İnşaatçılar qəsəbəsində 8 saylı yataqxanadakı su problemi aradan qaldırılmışdır. Bir ailəyə 500 manat dəyərində inşaat materialı, 12 ailəyə isə müxtəlif tikinti materialı verilmişdir. Hesabat ilində 15 ailənin yaşadığı fərdi mənzillərin dam örtükləri, 42-ci məhəllədə bir şəhid ailəsinin mənzili, Türk Liseyinin və “Sumqayıt” mehmanxanasının damındakı su novları, Sumqayıt şəhəri, 15-ci məhəllədəki yeddi yataqxanada ümumi istifadə sahələri,  40-cı məhəllədə isə  iki  binada su və kanalizasiya xətləri təmir olunmuş, “Sumqayıt” mehmanxanasında yanğın nəticəsində zərər çəkən bir ailəyə 500 manat, İnşaatçılar qəsəbəsində yaşayan bir şəhid ailəsinin  mənzilinin təmiri üçün 150 manat, Çaytumas kənd sakininə isə evinin təmiri üçün 250 manat  pul yardımı verilmişdir. “Şəfa” sanatoriyasındakı məclis evində və həyətində təmir, abadlıq işləri aparılmış, 10 saylı Texniki Peşə Liseyinin həyətinə 400 m2 asfalt döşənmişdir. İcra hakimiyyəti binasının arxa hissəsi, qazanxana otağı və divara üzlük daş çəkilmiş,  Aşağı Mollu və Çardaqlı tam orta məktəblərinin həyətində təmir və abadlıq işləri görülmüş, 40-cı məhəllədəki 1 və 2 saylı binaların dam örtüklərinin təmiri işləri həyata keçirilmişdir.
Hesabat ilində İcra hakimiyyəti təşəbbüsü ilə məcburi köckünlərin məskunlaşdığı  Ceyranbatan qəsəbəsi, bağlar yaşayış massivində Sumqayıt Regional Elektrik Şəbəkəsi tərəfindən həmin ərazidə bir ədəd yeni transformator quraşdırılmış, Xızı rayonunun Stalçay qəsəbəsində yaşayan köçkünlərimizin elekrtiklə bağlı problemləri aradan qaldırılmış, bir ailəyə 1 ədəd elektrik sayğacı və 150 metr kabel verilərək onun elektriklə bağlı problemi həll edilmişdir.
Ötən ildə  Sarıqaya ərazisində  sanatoriya binasında yanğın zamanı yararsız hala düşmüş bina qısa vaxt ərzində əsaslı təmir edilərək yenidən köçkünlərin istifadəsinə verilmişdir.  Rayon İcra hakimiyyəti tərəfindən yanğından zərər çəkən 14 ailənin hər birinə daxili imkanlar hesabına  500 manat, Nazirlər Kabinetinin xətti ilə isə 5 min manat pul köməkliyi edilmişdir.
2016-cı ildə  əhalinin aztəminatlı hissəsinə rayon İcra hakimiyyətinin daxili imkanları hesabına 113 min 867 manat pul köməkliyi edilmişdir. Ötən ildə  rayon İcra hakimiyyəti tərəfindən “Novruz” bayramı ilə əlaqədar 420 ailəyə müxtəlif ərzaq yardımı, 400 ailəyə də “Qurban” payı verilmişdir. Heydər Əliyev Fondu tərəfindən  ünvanlı sosial yardım alan ailələrə verilən ərzaq yardımı da rayondan olan 344 ailəyə çatdırılmışdır. Faşizm üzərində qələbənin 71-ci ildönümü münasibəti ilə 13 müharibə veteranının hər birinə daxili imkanlar hesabına 200 manat pul verilmiş, 1400 köçkün ailəsinə yataq dəsti və digər sənaye malları paylanmışdır.
Rayonda  büdcə vəsaitindən səmərəli istifadə olunması üçün ardıcıl iş aparılmışdır. Qeyd olunmuşdur ki, cari ildə Respublika üzrə cəmi 33 rayon mərkəzi büdcədən dotasiya almayacaq. Bu 33 rayondan biri də Qubadlı rayonudur. Məcburi köçkün rayonları içərisində yalnız bizim rayon özünü maliyyələşdirmə imkanına malikdir. Bu o deməkdir ki, rayonda sahibkarlığın inkişafı istiqamətdə aparılan  işlər öz nəticəsini vermişdir.
2016-cı ildə rayonda  7 min 885 nəfər pensiyaçı qeydiyyatda olmuş, Dövlət Sosial Müdafiə Fondunun rayon şöbəsi tərəfindən bütün müavinət və pensiyalar vaxtlı-vaxtında ödənilmişdir. İl ərzində 344 ailənin hər birinə 142,8 manat olmaqla ünvanlı sosial yardım verilmişdir. Hesabat ilində rayonda işsizlik səviyyəsinin aşağı salınması istiqamətində müəyyən işlər görülərək 215 yeni iş yeri yaradılmışdır.
Rayon ümumtəhsil məktəblərindən ali məktəblərə sənəd verən 303 məzundan 184 nəfəri tələbə adını qazanmışdır. Mərkəzi Xəstəxananın Poliklinika şöbəsi ötən ildə sakinlərə səhiyyə xidmətinin göstərilməsi işini davam etdirmiş,  17 min 966   ambulator xəstə qəbul etmiş, onlar arasında aşkar edilmiş xəstələrdən 206 nəfəri stasionar müalicəyə, 43 nəfər isə sanator-kurort müalicəsinə göndərilmişdir. Qeydiyyatda olan 455 nəfər şəkərli diabeti olan xəstələrə dərmanların vaxtlı-vaxtında  verilməsi təmin edilmişdir.
Gənclər siyasətinin rayonda aparılan adrıcıl işlərdən bəhs edən məruzəçi qeyd etdi ki, Gənclər və İdman idarəsi əlaqədar təşkilatlarla birgə müxtəlif idman növləri üzrə rayon birincilikləri,  gənclərdə hərbi vətənpərvərlik hislərinin güclənməsi, vətənə bağlılıq, pis vərdişlərdən uzaq olmaları məqsədilə bir sıra tədbirlər keçirmişdir. Ötən ildə  rayonun 54 idmançısı müxtəlif  idman növləri üzrə Azərbaycan birinciliyinin və Respublika turnirlərinin qalibi olmuş, 5 idmançı isə Beynəlxalq yarışlarda birinci yerə layiq görülmüşdür.
Hesabat dövrü  İcra hakimiyyətinə 117 yazılı müraciət daxil olmuşdur. Yazılı müraciətlərin 30 tam, 7-si isə qismən həll edilmiş, 10-u əsassız sayılmış, 57-nə müvafiq izahat verilmiş, 6-sı baxılmaq üçün aidiyyatı təşkilata göndərilmiş, 6-sının icrası müvafiq Dövlət Proqramında nəzərdə tutulmuş, 1-i isə icraata alınmışdır. Ötən ildə 895 vətəndaş qəbulu həyata keçirilmişdir.
Hesabat məruzəsi ətrafında çıxış edən rayon Təhsil şöbəsinin müdiri Fuad Bədəlov, Rayon Mərkəzi Xəstəxanasının baş həkimi Nüslət Əhmədov, Sumqayıt Regional Mədəniyyət və Turizm Şöbəsi Qubadlı rayon nümayəndəsi İlham Əhmədov, Xocahan İnzibati ərazi dairəsi üzrə nümayəndə Bəhruz Sərməsov, Rayon gənclər və İdman idarəsinin rəisi Natiq Abbasov, rayon Məşğulluq Xidmətinin direktoru Cəfər Ağayev və sahibkar Allahverdiyev Rüfət fəaliyyət sahələri üzrə görülən işlər barədə yığıncaq iştirakçılarına məlumat vermişlər.
Yığıncaq iştirakçılarının fəallığı ilə keçirilən tədbirdə müxtəlif təkliflər səsləndirilmiş, il ərzində görülmüş işlər qənaətbəxş qiymətləndirilmişdir. İştirakçılar əminliklə qeyd etdilər ki,  Prezident İlham Əliyevin Cəbrayıl rayonunun Cocuq Mərcanlı kəndinə qayıdışla bağlı verdiyi Sərəncam yaxın gələcəkdə işğaldan azad edilən Qubadlıya və digər rayonlarımıza da tətbiq ediləcəkdir.
Hesabat yığıncağında Prezident Administrasiyasının məsul işçisi Ağa-Əli Əhmədov və Milli Məclisin deputatı İmamverdi İsmayılov geniş nitq söylədilər.
Sonra rayonun sosial-iqtisadi, mədəni inkişafında, ictimai həyatında və digər sahələrdə yüksək nailiyyətlər qazanmış və fərqlənən bir qrup şəxsə Rayon İcra Hakimiyyəti başçısının Fəxri Fərmanları təqdim edildi.
Hesabat yığıncağında qərar layihəsi və Azərbaycan Respublikasının Prezidentinə müraciət qəbul olunmuşdur.

Keçidlər