2 İYUL- AZƏRBAYCAN POLİSİ GÜNÜ

02 iyul 2025-ci il tarixdə Qubadlı rayon İcra Hakimiyyətinin təşkilatçılığı ilə Abşeron rayonu, Stansı Sumqayıt ərazisində Məcburi köçkünlər üçün salınmış şəhərcikdə yerləşən Qubadlı rayon Polis şöbəsində  Azərbaycan polisinin yaranmasının 107-ci il dönümü münasibətilə tədbir keçirildi.

Tədbirdə QubadlıRayon İcra Hakimiyyətinin başçısı Malik İsaqov,Qubadlı Rayon Polis şöbəsinin rəisi Polis polkovniki Əhməd Nəcəfov, hüquq-mühafizə orqanlarının rəhbərləri, icra Hakimiyyətinin məsul işçiləri, rayon Polis şöbəsinin əməkdaşları, İdarə-müəssisə rəhbərləri və  təqaüddə olan Polislər iştirak edirdilər.

Tədbir iştirakçıları əvvəlcə Ulu Öndər Heydər Əliyevin rayonun Mirağa Əliyev adına Hal kənd tam orta məktəbində  abidəsi önünə gül dəstələri qoyaraq ehtiramlarını ifadə etdilər.Sonra tədbir Qubadlı rayon Polis şöbəsində davam etdirildi.

Tədbirdə Ulu Öndər Heydər Əliyevin və torpaqlarımızın bütövlüyü uğrunda canlarından keçmiş Şəhidlərimizin ruhu bir dəqiqəlik sükutla yad edildi.

Qubadlı rayon Polis şöbəsinin rəisi, Polis Polkovniki Əhməd Nəcəfov məruzə ilə çıxış edərək tədbiri açıq elan etdi.

Tədbirdə çıxış edən Qubadlı rayon İcra Hakimiyyətinin başçısı Malik İsaqov 2 iyul- Azərbaycan Polisi Günü münasibətilə bütün Polislərin peşə bayramını təbrik etdi, müstəqil dövlətçiliyimizin qorunmasında, ölkəmizdə sabitliyin təmin edilməsində Azərbaycan polisinin müstəsna xidmətləri olduğunu bildirdi. RİH başçısı Malik İsaqov qeyd etdi ki, müstəqil dövlətimizin ən mühüm atributlarından, əsas sütunlarından olan Azərbaycan polisinin 107 yaşı tamam olur. Azərbaycanın ilk polis bölüyü 1918-ci il iyulun 2-də Azərbaycan Xalq Cümhuriyyəti dövründə cinayətkarlıqla mübarizə aparmaq və ictimai təhlükəsizliyi təmin etmək məqsədilə yaradılıb.Azərbaycan polisinin müstəqil dövlətimizə uyğun formalaşmasında xalqımızın Ümummilli lideri Heydər Əliyevin müstəsna rolu olub. 1998-ci ildən iyul ayının 2-si Ümummili Lider Heydər Əliyevin fərmanı ilə Azərbaycan daxili işlər orqanları əməkdaşlarının peşə bayramı günü kimi qeyd olunur. Ulu öndər Azərbaycana rəhbərliyi dövründə daxili işlər orqanlarının təşkilati və ideoloji cəhətdən möhkəmlənməsi, peşəkar kadrların irəli çəkilməsi ilə bağlı önəmli qərarlar qəbul edib. Bu gün də Prezident İlham Əliyev polis işçilərinə diqqət və qayğı ilə yanaşır. Dövlətimizin başçısının həyata keçirdiyi hərtərəfli islahatlar çərçivəsində daxili işlər orqanlarının müasirləşməsi üçün bütün lazımi tədbirlər görülüb. Bu da polislərimizin peşəkarlığını, məsuliyyət hissini artırmaqla yanaşı, onlara daha yaxşı xidmət göstərmək üçün əlavə güc verir.

Rayon İcra Hakimiyyətinin başçısı Malik İsaqov qeyd etdi ki, Azərbaycan polisi Birinci Qarabağ müharibəsi zamanı ölkəmizin ərazi bütövlüyü uğrunda gedən döyüşlərdə fəal iştirak etmişdir. Qubadlı rayon polisləri də torpaqlarımızın müdafiəsi uğrunda gedən döyüşlərdə qəhrəmanlıqla vuruşmuşdur. I Qarabağ müharibəsində Qubadlı rayonundan 238 nəfər Şəhid olmuşdur. Onlardan 11 nəfəri Azərbaycanın Milli Qəhrəmanı adına layiq görülmüşdür. Şəhidlərimizdən 12 nəfəri Polis əməkdaşı olmuş, onlardan Mirzəyev Kərəm Ərşad oğlu və Əliyev Vasili Əhməd oğlu Azərbaycanın Milli Qəhrəmanıdır.

44 günlük müharibə nəticəsində Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə ölkənin ərazi bütövlüyünü, tarixi ədaləti, beynəlxalq hüququ bərpa etmişdir. Ermənistanın Azərbaycana qarşı təcavüzünün qarşısını almaq məqsədi ilə 27 sentyabrda bütün cəbhə boyu əks-hücuma keçən Azərbaycan Ordusu Birinci Qarabağ Müharibəsi zamanı Ermənistan tərəfindən işğal edilmiş əraziləri işğaldan azad etməyə başladı. 44 gün davam edən və “Vətən Müharibəsi” olaraq adlandırılan müharibə Şanlı Azərbaycan Ordusunun gücünü göstərərək Azərbaycanın qələbəsi ilə başa çatmışdır. "2023-cü il sentyabrın 19-20-də keçirilmiş birgünlük antiterror əməliyyatı nəticəsində Azərbaycan Qarabağdakı qanunsuz separatçı rejimin mövcudluğuna son qoydu və özünün beynəlxalq səviyyədə tanınmış əraziləri üzərində suverenliyini tam bərpa etdi".

Bütün təzyiqlərə, təhdidlərə baxmayaraq Azərbaycan Qələbə qazandı və tarixi ədalət bərpa olundu. 30 ilə yaxın həsrətində olduğumuz Qubadlı rayonu 25 oktyabr 2020-ci ildə şəhidlərimizin qanı və canı bahasına işğaldan azad olunmuşdur. 44 günlük Vətən müharibəsində qəhrəmanlar içərisində canından və qanından keçən Qubadlı rayonundan 12 şəhid və 60-dan çox yaralı öz adlarını tarixə yazdılar. Şəhidlərimizin qisası alındı, qanı yerdə qalmadı.

 Tədbirdə rayon Polis şöbəsinin rəis köməkçisi Polis mayoru Qalib Əhmədov Daxili İşlər Naziri cənab Vilayət Eyvazovun şəxsi heyəti və Polis veteranlarını təbriki və şəxsi heyətdən bir neçə nəfərin mükafatlandırılması barədə əmri oxudu.

Sonra tədbirdə çıxış edənlər,  rayon Prokuroru Emil Kərimov, Səfərbərlik və Hərbi Xidimətə Çağırış Üzrə Dövlət Xidimətinin Qubadlı rayon bölməsinin rəisi mayor Asəf Namazov, Dövlət Təhlükəsizlik Xidmətinin Qubadlı rayon bölməsinin əməkdaşı Əhəd Məmmədov, İstefada olan Polis polkovniki Nizami Əhmədov, “Bərgüşad” ictimai-siyasi qəzetinin baş redaktoru, keçmiş polis əməkdaşı Qafqaz Əvəzoğlu Dəmirov, Azərbaycanın Milli Qəhrəmanı, keçmiş polis əməkdaşı şəhid Vasili Əliyevin həyat yoldaşı, ehtiyatda olan polis zabiti Aygün Əliyeva, keçmiş polis zabiti, şəhid baş leytenant Bəhmən Mehtiyevin qızı Rəhminə Mehtiyeva , İstefada olan polis mayoru Azim Abbasov, keçmiş polis əməkdaşı Rövşən Mustafayev, Qubadlı rayon Mərkəzi Xəstəxanasının baş həkimi Yaşar Həsənov bütün polislərimizi 02 iyul polis günü münasibəti ilə təbrik edərək bildirdilər ki, Azərbaycan Polisi güclü maddi-texniki bazası, ictimai asayişin, qanunçuluğun və hüquq qaydasının qorunması üzrə dəqiq təşkil edilmiş sistemi və peşəkar kadr korpusu olan vahid mərkəzləşdirilmiş hüquq-mühafizə orqanıdır. Prezident İlham Əliyevin diqqət və qayğısı sayəsində davam edən bu inkişaf və modernləşmə vətəndaşlarımızın qanunla qorunan hüquq və mənafelərini etibarlı müdafiə etməyə, cinayətkarlığa, onun transmilli mütəşəkkil növlərinə qarşı mübarizədə adekvat cavab tədbirləri görməyə tam imkan verir.

Çıxış edənlər ölkə başçısına və rayon rəhbərliyinə şəhid ailələrinə və polislərə göstərilən diqqət və qayğıya görə minnətdarlıqlarını bildirdilər.

Daha sonra RİH başçısı Malik İsaqov tərəfindən fəal polis əməkdaşlarına rayon İcra Hakimiyyətinin  fəxri fərmanları, keçmiş polis işçilərinə isə qiymətli hədiyyələr təqdim olundu.

İctimai asayişin və təhlükəsizliyimizin keşiyində dayanan məsuliyyətli peşə sahiblərini – Polislərimizi Polis Günü münasibətilə səmimi qəlbdən təbrik edirik. Bu əlamətdar gündə onların hər birinə fədakar əməyi üçün təşəkkür edir, işlərində uğurlar, əmin-amanlıq və möhkəm cansağlığı arzulayırıq !